ފުވައްމުލައް: ފެހި، ފަހި، ސްމާޓް

ދެވަނަ ދައުރުގެ ވިސްނުން

ދެވަނަ ދައުރުގައިވެސް ކައުންސިލުން މިހާރުވެސް ފަށާފައި ހުރި މަސައްކަތްތަކާއި ތަންފީޒު ކުރަން ނިންމާފަހުރި ސިޔާސަތުތައް ކުރިއަށް ދާނެ. ރައްޔިތުންނަށް ޚިދުމަތް ދިނުމާއި ކައުންސިލް ހިންގުން އިތުރަށް ހަރުދަނާ ކުރަން އިސްކަން ދެވޭނެ. އަދި ދެމެހެއްޓެނިވި އިގްތިސާދެއް ބިނާކޮށް، ދުޅަހެޔޮ އުފާވެރި މުޖުތަމައެއް ބިނާކުރުމަކީ މަސައްކަތުގެ މުހިންމު ބަޔަކަށް ވެގެންދާނެ. ފުވައްމުލައް ފެހި، ފަހި، ސްމާޓް ސިޓީއަކަށް ހަދަން ފަށާފައިވާ ދަތުރު ކުރިއަށް ދާނެ.

ތިރީގައި މިވަނީ ކައުންސިލްގެ މިހާރުގެ ތަރައްގީގެ ޕްލޭންގައި ހިމެނޭ ސްޓްރެޓެޖިކް ފަސް ދާއިރާއިން ކުރިއަށް ގެންދިއުމަށް ގެންގުޅޭ މައިގަނޑު ވިސްނުންތައް. މިކަންކަން ދެވަނަ ދައުރުގައި ތައްޔާރުކުރެވޭ ތަރައްގީގެ ޕްލޭންގައި ހިމުނަމަށް މަސައްކަތް ކުރެވޭނެ.

  • ރަށުގެ ފަތުރުވެރިކަން ދެމެހެއްޓެނިވިގޮތެއްގައި ކުރިއަށް ގެންދިއުމަށް މިހާރު ފާސްކޮށްފައިވާ ޑައިވްކުރުމާއިބެހޭ އުސޫލް ތަންފީޒުކުރުމަކީ އިސްކަން ދެވޭނެ ކަމެއް
  • މިހާރު ހުށަހަޅާފައިވާ ބިނާވެށި ޕްލޭންގައި ހިމެނޭ އިކޯޓޫރިޒަމް އަދި ފަތުރުވެރިކަމުގެ އެހެންވެސް ސަރަހައްދުތައް ތަރައްގީކުރަން ހުޅުވާލުން
  • މިހާރު ހުށަހަޅާފައިވާ ބިނާވެށި ޕްލޭންގައި ހިމެނޭ ހެރިޓޭޖް ޓްރެއިލް ގާއިމުކޮށް ސަގާފަތާއި، ތަރިކަ އަދި ކެއުމަކީ ފަތުރުވެރިކަމުގެ ބައެއްގެ ގޮތުގައި ހިމަނައިގެން މަސައްކަތް ކުރުން
  • ރަށް އިޝްތިހާރު ކުރުމުގައި ސްޕޯޓްސް ފިޝިން އަދި ސާފިން ކަހަލަ ކަންކަމަށް އިތުރަށް ފޯކަސް ކުރުން
  • ޕްރައިވެޓް ސެކްޓަރ ޕާޓްނާޝިޕް މޮޑެލްގައި މަސައްކަތް ކުރުމަށް އިސްކަން ދިނުން
  • ފުވައްމުލަކަކީ ތައުލީމީ ހަބަކަށް ހަދަން ކުރާ މަސައްކަތުގެތެރޭ މިހާރު ގައުމީޔުނިވާސިޓީ އަދި ޓިވެޓް ސެންޓަރ އަޅަން ހަވާލުކޮށްފައިވާ ޕްރޮޖެކްޓްތައް އަވަސްކުރަން މަސައްކަތް ކުރުން
  • ޑިޖިޓަލް އިކޮނޮމީއެއް ގާއިމު ކުރުމަށް ކައުންސިލުން ފަށާފައިވާ މަސައްކަތްތަކުގެ ތެރެއިން، އައިޓީ ޓްރެއިނިން ފެސިލިޓީ ނިންމާ، ތަމްރީނު ޕްރޮގްރާމްތައް ފެށުން
  • ފުވައްމުލަކަކީ ޑިޖިޓަލް ނޯމެޑްސް އަށް ފަހި މަންޒިލަކަށް ހަދަން މަސައްކަތް ކުރުން. މީގެ ތެރޭ ކޯވާކިން ސްޕޭސް ހެދުން ހިމެނޭ
  • ބައިނަލް އަގުވާމީ މުބާރާތްތައް ބޭއްވޭ ފެންވަރުގެ ބެޑްމިންޓަން ސްޓޭޑިއަމެއް ޕްރައިވެޓް ޕާޓްނާޝިޕް މޮޑެލްގެ ތެރެއިން ގާއިމު ކުރުން. މިއީ ސްޕޯޓްސް ޓޫރިޒަމް ފުޅާކުރަން ގާއިމުކުރެވޭ މުހިންމު ވަސީލަތަކަށް ވެގެން ދާނެ. މިކަމަށް މިހާރުވަނީ ބިން ކަނޑައެޅިފައި
  • ގެވެށި އަދި ކުދިވިޔަފާރިތައް ބާރުވެރިކޮށް ފުޅާކުރުމަށް ފަށާފައިވާ މަސައްކަތް އިތުރަށް ފުޅާކުރުން. މިގޮތުން މައިކްރޯ ފައިނޭންސް ސްކީމްގެ ފުރުސަތުތައް އިތުރުކޮށް، އުފެއްދުންތެރިކަން އިތުރުކޮށް ފެންވަރު ރަނގަޅުކުރުމަށް އިތުރު ތަމްރީނު ޕްރޮގްރާމްތައް ހިންގާ، ރަށުގެ އުފެއްދުންތައް ވިއްކާ މާކެޓް ކުރުމަށް ‘އޯތެންޓިކް ފުވައްމުލައް’ ގެ ދައުރު ފުޅާކުރުން ހިމެނޭ
  • މަސްވެރިން ބާނާ މަސް ގަނެއް ރައްކާކުރަން މިފްކޯއިން ހުޅުވާފައިވާ ފެސިލިޓީގެ ޚިދުމަތް އިތުރަށް ފުޅާކުރަން މަސައްކަތް ކުރުން، އަދި ބާނާ މަހަށް، ޚާއްސަކޮށް ބޮޑު ކަންނެލިއަށް ރަނގަޅު އަގު ހޯދަން މަސައްކަތް ކުރުން
  • ދަނޑދުވެރިކަމުގެ ގައުމީ ލެބޯޓްރީ އާ އިމާރާތުގެ މަސައްކަތް އަވަހަށް ނިންމާ އަދި އެތަނުގެ ޚިދުމަތް ފުރިހަމަގޮތެއްގައި ފެށުމަށް ބާރުއަޅާ މަސައްކަތް ކުރުން. 
  • ދަނޑުވެރިކަމަށް ހުޅުވާލެވޭ ގްރާންޓްތައް ފުވައްމުލަކުގެ ދަނޑުވެރިންނަށް ހޯދައިދޭން މަސައްކަތް ކުރުން
  • ކޮމިއުނިޓީ ގާޑަން އާއި އާބަން ފާމިންގެ ޕައިލޮޓް ޕްރޮޖެކްޓެއް ހިންގުން
  • ކާބޯތަކެތީގެ ރައްކާތެރިކަން ކަށަވަރުކުރުމަށް މަސައްކަތް ކުރުން. މިގޮތުން އަލަ، ބަނބުކެޔޮ ފަދަ ބާވަތްތައް ހައްދަން މަގުފަހިކޮށްދިނުން
  • ވާލުގެ އުނދަގޫ ބޮޑުވެފައިވާ އިރު، ވާ މަރަން ހުއްދަ ލިބުން މިހާރު އޮތީ ހުއްޓިފައި. މިހާރުވެސް މަސައްކަތް ކުރަމުންދާގޮތަށް ފުވައްމުލަކުން ވާ މަރާ ހުސްކުރަން ޚާއްސަ ހުއްދައެއް ލިބޭތޯ މަސައްކަތް ކުރުން
  • ކައުންސިލް ނާސަރީ މެދުވެރިކޮށް ދަނޑުވެރިންނަށް ބޭނުންވާ މުޑުވައްތައް އާލާކުރުން
  • ރަށުގެ އިގްތިސާދީ ކުރިއެރުން މިނެކިރޭނެ ތަފާސްހިސާބު އެއްކޮށް ބެލެހެއްޓުން، އަދި އާންމުކުރުން. މީގެއިތުރުން ރަށުގެ ޖީޑީޕީ ހިސާބުކުރެވޭނެ ގޮތްތައް ހޯދުން
  • މިހާރު ފާށާފައިވާ ނަމާދު ޕްރޮގްރާމް އިތުރަށް ފުޅާކުރުން. އެގޮތުން އިތުރު އުމުރުފުރާތަކަށް ހުޅުވާލުމާއި، މުގައްރަރަށް އިތުރު ބައިތައް ލުން ހިމެނޭ
  • މިސްކިތްތަކުގެ ދައުރު ފުޅާކުރުން. މިގޮތުން މިސްކިތްތަކަކީ  ދީނީ ހޭލުންތެރިކަމާއި ތަރުބިއްޔަތު ކުރުމުގައި އަދި އިޖްތިމާއީ ގުޅުން ބަދަހި ކުރުމުގެ ރޯލެއް އޮންނަ ތަނަކަށް ހެދުން
  • ހުނަރު ޕްރޮގްރާމްތައް އިތުރުކުރުން
  • ކުށްމަދު އަމާން ވެށްޓެއް ގާއިމު ކުރުމަށް ފުލުހުންނާއި ގުޅިގެން ކުރާ މަސައްކަތްތައް އިތުރުކުރުން. އެގޮތުން ރަށުގެ ސީސީޓީވީ ނެޓްވޯކް ފުޅާކުރުން ހިމެނޭ. އަދި މަސްތުވާތަކެތީގެ ވިޔަފާރި ހުއްޓުވުމާއި މަގުމަތީ ސަލާމަތާއި ރައްކާތެރިކަމަށް ޚާއްސަ އިސްކަމެއް ދިނުންވެސް ހިމެނޭ
  • ޕްބްލިކް ލައިބްރަރީގެ ޚިދުމަތް ފުޅާކުރުން
  • ސިއްހަތާއި ރައްޓެހި ދިރިއުޅުމުގެ އާދަކާދަތަކާއި މެދު ހޭލުންތެރިކަން އިތުރުކުރުން
  • މަސްތުވާތެކިތީގެ ވަބާގައި ޖެހިފައިވާ ފަރާތްތަކަށް ބޭނުންވާ ރަނގަޅު ފަރުވާ ރަށުން ލިބޭނެ އިންތިޒާމް ހަމަޖައްސަން މަސައްކަތް ކުރުން، އަދި މަސްތުވާތަކެތިން ސަލާމަތްވާން ބޭނުންވާ ފަރާތްތަކަށް މުޖުތަމުގެ އެހީތެރިކަމާއި އެއްބާރުުން ލިބޭނެފަދަ ނިޒާމެއްގެ ތެރެއިން އެކަން ވާނެގޮތް މަގުފަހިކުރަން މަސައްކަތް ކުރުން
  • ކައުންސިލް ސޯޝަލް ސަޕޯޓް ޑެސްކްގެ ޚިދުމަތް ފުޅާކުރުން
  • އިސްރަށްވެހިން، ޚާއްސައެހީއަށް ބޭނުންވާ ފަރާތްތައް، އަންހެނުން، ކުޑަކުދިން އަދި ޒުވާނުންނަށް އަމާޒުކޮށްގެން ހިންގޭ ހަރަކާތްތައް އިތުރަށް ފުޅާކުރުން
  • އިޖްތިމާއީ ރައްކާތެރިކަން ކަށަވަރު ކުރުމަށް ކަމާބެހޭ މުއައްސަސާތަކާއި ގުޅިގެން މަސައްކަތް ކުރުން. އަދި އިބަމައިގެ ރޯލް ފުޅާކޮށް މަސައްކަތްތައް ހަރުދަނާ ކުރުން
  • ގުޅުންބަދަހި އަޅާލާ މުޖުތަމައެއް ބިނާކުރަން ފެށިފައިވާ މަސައްކަތް ކުރިއަށް ގެންދިއުން. މިގޮތުން ގިނަމީހުނަށް ބައިވެރިވެވޭ ކަހަލަ އިވެންޓްތައް އިތުރުކުރުމާއި، ރަށު ލެވެލްގައި ބާއްވާ ހަރަކާތްތައް އިތުރުކުރުން ހިމެނޭ
  • އެއްބަޔަކު އަނެއް ބަޔަކަށް އަޅާލާ އެހީތެރިވުމުގެ ސަގާފަތް އިތުރަށް ދިރުވާ އާލާކުރަން މަސައްކަތް ކުރުން
  • ކުޅިވަރު ވަސީލަތްތައް އިތުރުކޮށް، ޕްރޮގްރާމްތަކާއި މުބާރާތްތައް ބޭއްވުން
  • ސަރަހައްދީ، ގައުމީ  އަދި ބައިނަލް އަގުވާމީ ކުޅިވަރު މުބާރާތްތައް، ޚާއްސަކޮށް ގިނަ މީހުން ބައިވެރިވާ، ފުވައްމުލަކުގައި ބޭއްވުމުގެ ފުރުސަތު ހޯދަން މަސައްކަތްކުރުން
  • ސަގާފަތާއި، ތަރިކަ އަދި އާޓްސް ދިރުވުން. މިގޮތުން ރަށުގެ ސަގާފަތާއި ތަރިކާއާއި ބެހޭ މައުލޫމާތު އެއްކޮށް، އެމައުލޫމާތުތައް އާންމުކޮށް ފެންނަގޮތަށް ބެހެއްޓުން ހިމެނޭ
  • މިހާރު ހުށަހަޅާފައިވާ ބިނާވެށި ޕްލޭން ތަންފީޒުކުރުން 
  • މިހާރު ހުށަހަޅާފައިވާ ބިނާވެށި ޕްލޭންގައި ހިމެނޭ ރިއަލް އިސްޓޭޓް އުސޫލުން ތަރައްގީކުރަން ޕްލޭންކުރެވިފައިވާ ގެދޮރު އަދި އޮފީސް/ވިޔަފާރި އިމާރާތްތައް ތަރައްގީކުރަން ހުޅުވާލުން
  • މިހާރު ޕައިލޮޓް ކުރެވެމުންދާ ސްމާޓް ސިޓީ ޓެކްނޮލޮޖީތައް އާންމުކޮށް ބޭނުންކުރަން ފަށާ އަދި ސިޓީގެ ޑިޖިޓަލް ޓްވިންއެއް ގާއިމުކުރުމުގެ މަސައްކަތް ފެށުން
  • ވިލުންވެރި ސިޓީއެއް ބިނާކުރަން އިސްކަން ދިނުން. އެގޮތުން މިހާރު އުފެދިފައިވާ ޑިޒާސްޓަރ މެނޭޖްމެންޓް ޕްލޭނަށް ރައްޔިތުން އަހުލުވެރިކޮށް، ވޮލަންޓަރީ ރެސްޕޮންސްޓީމްތަކުގެ ހުނަރު އިތުރުކޮށް އަދި ވޯލްޑް ބޭންކްގެ އެހީއާއި އެކު ތަރައްގީކުރެވޭ ދުރާލާ އިންޒާރުދޭނިޒާމް ފުރިހަމައަށް ބޭނުންކުރުން ހިމެނޭ
  • ރައްޔިތުންނަށް ފޯރުކޮށްދޭ ފެނުގެ ރައްކާތެރިކަން ކަށަވަރު ކުރުން. އެގޮތުން އެފެން ޓެސްޓުކޮށް ރައްކާތެރިކަން ޔަގީންކުރުން ހިމެނޭ. އަދި ޔޫއެންޑީޕީގެ އެހީގައި ގާއިމުކުރަން މަސައްކަތް ކުރެވެމުންދާ ބިއްލޫރިފުޅީގައި ފެންބަންދުކުރާ ޕްލާންޓުގެ ޚިދުމަތް ފެށުން
  • ކަރަންޓު، ބޯފެން، ނަރުދަމާ އަދި ކުނީގެ ޚިދުމަތް ދޭ ފަރާތްތަކާއި ކައުންސިލާއި ދޭތެރޭ ހަދަންޖެހޭ އެއްބަސްވުންތައް ހެދުން. މީގެ ސަބަބުން މި ޚިދުމަތްތަކުގެ ފެންވަރާއި ޚިދުމަތް ލިބުމުގައި ދިމާވާ ކަންކަމަށް ޚިދުމަތް ފޯރުކޮށްދޭ ފަރާތްތައް ޖަވާބުދާރީ ކުރުވަން ކައުންސިލަށް ފަސޭހަވެގެންދާނެ. އަދި ރައްޔިތުން ބޭނުންވާގޮތަށް އެ ޚިދުމަތްތައް ފޯރުކޮށްދޭން ކައުންސިލަށް ޚިދުމަތް ފޯރުކޮށްދޭ ފަރާތްތަކާއި ގުޅިގެން މަސައްކަތް ކުރުމުގެ މަގު ފަހިވެގެންދާނެ
  • އާރުޓީއެލް ޕްރޮޖެކްޓްތެރެއިން މިރަށުގައި ގާއިމުކުރަން ޕްލޭންކޮށްފައިވާ ފެރީޓާމިނަލް އެޅުން ލަސްވަމުންދާތީ، ފެރީޓާމިނަލް އެޅުމުގެ މަސައްކަތް ފެށުން
  • ބަނދަރުގެ ޖާގައިގެ ދަތިކަން ހައްލުކުރަން ރޭވިފައިވާ ބަނދަރު ބޮޑުކުރުމުގެ މަޝްރޫއު ކޮންޓްރެކްޓަރ އަދި ކަމާބެހޭ މިނިސްޓްރީތަކާއި ގުޅިގެން އަވަސްކުރަން މަސައްކަތްކުރުން
  • ބަނދަރުގެ ބޭރުތޮށި ހުރިހާމޫސުމެއްގައިވެސް ބޭނުން ކުރެވޭގޮތަށް، ބަނދަރު ބޮޑުކުރުމުގެ ކޮންސަލްޓެންޓެ ނީރާސް އިން ހުށަހަޅާފައިވާ ގޮތަށް މަރާމާތު ކުރުން
  • ބަނދަރުގެ ޖާގައިގެ ދަތިކަމަށް ދާއިމީ ހައްލެއް ހޯދުމަށް އެންމެ އެކަށީގެންވަ ހައްލަކީ ކޮބައިތޯ ބެލުމަށް ކަމާބެހޭ މިނިސްޓްރީތަކާއި ގުޅިގެން މަސައްކަތް ކުރުން
  • ސިޓީސްކުއަރ، ތޫނޑު އަދި ފަންނުތައް ތަރައްގީކުރުމުގެ މަސައްކަތް ކުރިއަށް ގެންދިއުން
  • މިހާރު ހުށަހަޅާފައިވާ ބިނާވެށި ޕްލޭންގައި ހިމެނޭ ފެހި ސަރަހައްދުތަކާއި ބޮޓަނިކް ގާޑަން އަދި ފޮރެސްޓް ޕެޗްތައް ގާއިމުކުރުން
  • ތިމާވެށްޓާއި ރައްޓެހި ދިރިއުުޅުމުގެ އާދަތައް އާލާކުރަން ހޭލުންތަެރިކަން އިތުރުކުރުމުގެ ޕްރޮގްރާމްތައް ހިންގުން
  • ޖަޕާނު ސަރުކާރުގެ އެހީގައި ކައުންސިލުން ހޯދައިފައިވާ ކާދު ހަދާ މެޝިން ބޭނުންކުރަން ފެށުން
  • ރައްޔިތުން ބައިވެރިކޮށްގެން ހިންގާ ރަށުތެރެ ސާފުކުރުމުގެ ޕްރޮގްރާމްތައް އިތުރުކުރުން. އަދި ކުންޏާއި ކުނި އުކާލުމާއި މެދު ހޭލުންތެރިކަން އިތުރުކުރަން މަސައްކަތް ކުރުން
  • ރަށުގެ ނެތެމުންދާ ގަސްތައް އާލާކުރުމަށާއި ރަށުތެރެ ޒީނަތްތެރިކޮށް ލޭންޑް ސްކޭޕް ކުރުމަށް ގަސް އާލާ ކުރުމަށް ގާއިމުކޮށްފައިވާ ނާސަރީގެ މަސައްކަތް ފުޅާކުރުން
  • ކައުންސިލްގެ އިމާރާތްތައް ސޯލާކުރުމަށް ފަށާފައިވާ މަސައްކަތް ކުރިއަށް ގެންދިއުން. އަދި ރަށުގައި ވިޔަފާރި އުސޫލުން އިއާދަކުރަނިވި ހަކަތައަށް އިންވެސްޓު ކުރުމަށް ބޭނުންވާ ފަރާތްތަކަށް މަގުފަހިކޮށްދިނުން
  • ޗަސްބިން ސަރަހައްދު ތަރައްގީކުރަން ކައުންސިލުން ހަދާފައިވާ ކޮންސެޕްޓާއި އެއްގޮތަށް އެތަން ތަރައްގީކުރަން ހުޅުވާލުން
  • ހިމާޔަތް ކޮށްފައިވާ ސަރަހައްދުތައް ބެލެހެއްޓުމުގެ ނިޒާމް ހަރުދަނާ ކުރުން
  • ކައުންސިލުން ބައިވެރިވެފައިވާ އޯޕަން ގަވަރމަންޓް ޕާޓްނާޝިޕްގައި ކައުންސިލުން ޔަގީންކަން ދީފައިވާގޮތަށް ‘އޯޕެން ޕްރޮކިއުންމެންޓް’ ހަމަތަކާއި އެއްގޮތަށް ޕްރޮކިއުމެންޓް ނިޒާމް ބަދަލުކުރުން
  • ކަސްޓަމަރ ސާވިސް އިތުރަށް ރަނގަޅުކުރުން. އެގޮތުން މުއައްޒަފުންނަށް އިތުރު ތަމްރީނު ޕްރޮގްރާމްތައް ދިނުމާއި ކޯލްސެންޓަރގެ ޚިދުމަތް ފުޅާކުރުން ހިމެނޭ 
  • މުއައްޒަފުންނަށް ބޭނުންވާ ޓްރެއިނިން އަދި ވަސީލަތްތައް ހޯދައި ދިނުން. އެގޮތުން ބިމާބެހޭ އެންމެހާ  ކަންކަން ބެލެހެއްޓުމަށް މިހާރު ފެށިފައިވާ ލޭންޑް މެނޭޖްމެންޓް ސިސްޓަމް ހެދުމުގެ މަސައްކަތް ކުރިއަށް ގެންދިއުން ހިމެނޭ
  • ރަށުން ނެގޭ ޓެކްސްތަކުން ބައެއް، ސީދާ ރަށުގެ ބަޖެޓަށް ލިބޭގޮތަށް ހަމަޖެއްސުމަށް ބާރުއަޅާ މަސައްކަތް ކުރުން
  • ބޭރުގެ ޖަމްއިއްޔާ ޖަމާއަތްތަކާއި އޮންނަ ގުޅުން އިތުރަށް ބަދަހިކޮށް، ރައްޔިތުންގެ ކުރިއެރުމާއި ތަރައްގީއަށް ބޭނުންވާ އެހީ ހޯދުމަށް މަސައްކަތް ކުރުން
  • އެހެން ކައުންސިލްތަކާއި އޮންނަ ގުޅުން އިތުރަށް ބަދަހިކޮށް ރައްޔިތުންނަށް ޚިދުމަތް ދިނުމުގެ ތަޖުރިބާ ބަދަލު ކުރުން